Варнадан хушхабар: спорт гимнастикачиларимиздан Жаҳон кубогида иккита бронза!

Токио-2020 Олимпиадаси олдидан лицензиант спортчиларимизга сўнгги кўрик, қолганлар учун эса ўз имкониятларини синовдан ўтказиш вазифасини ўтаб берувчи ушбу мусобақада Ўзбекистон терма жамоаси аъзолари анчайин муваффақиятли иштирок этишаётганлигини таъкидлаш жоиз.

Жумладан, спорт гимнастикаси афсонаси Оксана Чусовитина ўзининг севимли йўналиши – таяниб сакраш машқида бронза медалига сазовор бўлди. Биз ушбу ғалаба билан Оксанани табриклаймиз.

Худди шу йўналишда қатнашган яна бир вакиламиз Анастасия Мирошниченко эса 4-ўринни эгаллади. Бундан хулоса қилиш мумкинки, Оксанага муносиб ўринбосар етишиб чиқмоқда.

Шунингдек, мусобақанинг сўнгги кунида яна бир спортчимиз Абдулла Азимов ҳам бронза медалини қўлга киритди. Биз терма жамоа спортчилари ва мураббийларимизни ажойиб ғалабалар билан муборакбод этамиз!