Водилда белбоғли кураш бўйича анъанавий турнир ўтказилди

Водил қишлоғида туғилиб вояга етган, кураш мухлислари қалбидан жой олган, ўз даврининг машҳур ва номдор полвонлари бўлган - Хамид полвон Тешабоев, Темир полвон Мамажонов ва Турсунали полвон Мамажоновлар хотираси учун ҳамда 1 июнь - Халқаро болаларни ҳимоя қилиш куни муносабати билан белбоғли кураш бўйича эркаклар ўртасида анъанавий республика очиқ турнири ўтказилди. Мазкур Республика очиқ турнирида Ўзбекистон, Қирғизистон, Тожикистон, Ҳиндистон давлатларидан 200 нафарга яқин энг номдор полвонлар иштирок этишди.

Ўзбекистон белбоғли кураш федерацияси, Фарғона вилояти ҳокимлиги, Фарғона вилояти спорт бошқармаси, Фарғона тумани ҳокимлиги ҳамда вилоят белбоғли кураш федерацияси ҳамкорлигида юқори савияда ташкил этилган мазкур турнирда полвонлар 8 та вазн тоифаларида беллашишди. Турнир доирасида шунингдек, тантанали очилиш маросими ташкил этилди.
Юқорида таъкидлаганимиздек, элда азиз полвон боболарнинг ёрқин хотираси учун ташкил этилган белбоғли кураш беллашувлари шиддатли ва муросасиз бўлди.
Айниқса, ҳар эшигидан ҳа деса полвонлар бўй кўрсатадиган, асли наслида полвонлик қони уфуриб турадиган водилликликларнинг курашини кўп сонли белбоғли кураш мухлислари шоду хуррамлик билан олқишлаб туришди.

Очиғи, биз ҳам беллашувларни кураш майдонида туриб томоша қилдик ва шу ерлик аҳолининг миллий спорт туримиз белбоғли курашни ашаддий шайдоси эканлигига, полвонларидан ғурурланишига ҳавас қилдик. Янаям эътиборлиси, боғча болаларининг ҳам белбоғли кураш баҳсларини қувонч билан кузатиши бўлди.
Сайил кураши тарзида ўтган ушбу турнирда Нажмиддин Умаров, Ҳаётбек Камолиддинов, Нодирбек Ҳайдаралиев, Диёрбек Полвонбоев, Фаёзбек Абдуғаффаров, Паҳлавон Умаралиев, Ойбек Муҳаммадов, Бобиржон Тўхтасинов сингари полвонлар ўз вазн тоифаларида рақибларини енгиб, ташкилотчилар томонидан диплом, медаль ва қимматбаҳо эсдалик совринларга эга бўлишди.

Илҳом РАҲМОНОВ Водил қишлоғидан тайёрлади