05 ноя 10:52
Янгиликлар

Теннис

WTA Finals. Арина Соболенко муддатидан олдин плей-оффда!

Дунёнинг биринчи ракеткаси Арина Соболенко Ар-Риёдда давом этаётган йилнинг Якуний WTA турнирида иккинчи ғалабасини қўлга киритди.

Беларуслик теннис маликаси WTA Finals гуруҳ босқичининг иккинчи учрашувида ҳам ғалабага эришди. Арина дунёнинг тўртинчи ракеткаси италиялик Жасмине Паолинини икки сет натижасига кўра мағлубиятга учратди - 6/3, 7/5.

Теннисчиларнинг ўзаро бешинчи учрашувига келиб Соболенко ҳисобда олдинга чиқиб олди. Тўқсон бир дақиқалик баҳсда Арина 5 та эйс, 5 та брейк қайд этиб, 6 та қўшхатога йўл қўйди.

Шу тариқа, беларуслик теннисчи икки ғалаба эвазига муддатидан олдин плей-оффга йўл олди. Иккинчи йўлланма тақдири учинчи турда Жасмине Паолини ҳамда хитойлик Чжэн Циньвэнь ўртасидаги учрашувда ҳал бўлади. Қозоғистонлик Елена Рибакина гуруҳдан чиқиш имкониятидан маҳрум бўлиб улгурди.