WTA Finals. Бош соврин дунёнинг олтинчи ракеткасида!

Жаҳон рейтингида дастлабки саккиз ўринни эгаллаб турган теннис маликалари ўртасида ўтказилган мусобақада Каролин Гарсия бош совринни қўлга киритди. 

Дунёнинг олтинчи ракеткаси бўлиб турган франциялик теннисчи ҳал қилувчи финал учрашувида рейтингда ўзидан бир поғона юқорида жойлашган беларуслик Арина Соболенкони 7/6(4), 6/4 ҳисобида мағлубиятга учратди.

Теннисчилар кортда 101 дақиқа ҳаракат қилишган. Бу уларнинг ўзаро ўтказган бешинчи учрашуви бўлиб, Каролин ҳисобда олдинга чиқиб олди - 3:2. Гарсия 11, Соболенко эса 4 та эйс зарбасини амалга оширган. 

Каролин Гарсия фаолиятидаги 11-совринни қўлга киритди. WTA Finals турниридаги муваффақиятли иштирок унга 1375 рейтинг очкоси ҳамда 1,570,000 доллар мукофот пули келтирди. Жаҳон рейтингида у 4-ўринга кўтарилиб олади. Соболенко эса бешинчи ракеткага айланади ҳамда 955 рейтинг очкоси билан бирга ўз ҳамёнини 750,000 долларга бойитади.