WTA Якуний турнирининг илк финалчиси маълум

Бироз аввал дунёнинг кучли саккиз нафар теннис маликалари иштирокида ўтаётган мусобақанинг илк финалчиси маълум бўлди. Сайёрамизнинг бешинчи ракеткаси, испаниялик Гарбин Мугуруса рейтингнинг ўнинчи поғонасидан жой олган ватандоши Паула Бадосадан икки сетда ҳам бир хил ҳисобда устун келди - 6/3, 6/3. 

Саксон беш дақиқа давом этган баҳсда 28 ёшли Мугуруса 2 та эйс, 3 та брейк-пойнт, 24 яшар Бадоса эса 3 та эйс зарбани ижро этди. Бу ҳамюртларнинг ўзаро ўтказган илк учрашуви эди. Гарбиннинг WTA Finals турнири финалидаги рақибаси бироздан сўнг бошланадиган Анетт Контавейт (Эстония) - Мария Саккари (Греция) учрашувидан сўнг аниқланади.