Ханчжоу-2022, Париж-2024: Дзюдо федерациясининг тақдимоти ўтказилди

Бугун куннинг иккинчи ярмида ZOOM платформасида Ўзбекистон дзюдо федерациясининг ушбу икки нуфузли мусобақага бағишланган тақдимоти ўтказилди. Тадбирда Ўзбекистон Миллий олимпия қўмитаси ҳамда Ўзбекистон Жисмоний тарбия ва спорт вазирлиги мутасаддилари кузатиб боришди.

Тақдимотни Ўзбекистон дзюдо федерацияси раис ўринбосари Шоатхам Исроилов намойиш қилди. Мутахассис яқин 4 йил ичида дзюдо оламида рўй берадиган воқеликлар, жумладан, пойтахтимиз мезбонлик қиладиган катталар ўртасидаги жаҳон чемпионатига тайёргарлик, вазн тоифаларидаги ротациялар, селекция ишлари, Токио Олимпиадасига 10 та шахсий вазн тоифалари ва жамоавий йўналишда лицензия қўлга киритиш режалари ҳақида батафсил гапириб берди.

Шунингдек, тақдимот давомида МОҚ президенти маслаҳатчиси Назиржон Худойқулов ҳам ўз фикрларини билдириб ўтди.

“Тақдимот билан яқиндан танишдик. Айтиш мумкинки, барчаси аниқ ва равшан кўрсатиб ўтилган. Шу ўринда селекция ишларини янада чуқурроқ ва кенг кўламда олиб бориш муҳим. Зеро, дзюдо доимо юртимиз номини дунёга танитган спорт турларидан ҳисобланади. Бу борада Жисмоний тарбия ва спорт вазирлиги ҳамда Миллий олимпия қўмитаси ўз ёрдамини беришга тайёр”, – деди Н.Худойқулов.

Тадбир давомида Равшан Аҳмаджонов терма жамоамизнинг ўз олдига қўйган улкан мақсадлари ҳамда мазкур тақдимот бўйича атрофлича фикр-мулоҳазалар билдирди.