Йилнинг Якуний ATP турнирида чемпион аниқланди (барча маълумотлар)

Ҳал қилувчи финал учрашувида дунёнинг биринчи ракеткаси италиялик Янник Синнер ATP рейтингида бешинчи ўринни эгаллаб турган америкалик Тэйлор Фритцга қарши кортга чиқди. Бу икки теннисчи мусобақанинг гуруҳ босқичида ҳам ўзаро тўқнаш келишган ва унда Синнер ғалаба қозонганди. 

Финалда ҳам сценарий ўзгармади. Янник рақибини худди биринчи учрашувда бўлгани сингари бир хил ҳисобларда таслим этди - 6/4, 6/4. Теннисчиларнинг ўзаро учрашувларида италиялик олдинда бормоқда - 4:1. 

Саксон тўрт дақиқа давом этган финал баҳсида Синнер 14, Фритц 8 та эйс зарбасини амалга оширган. Янник - Якуний ATP турнирида чемпион бўлган биринчи италиялик теннисчига айланди. У 2016 йилдан кейин ўз уйида чемпионликка эришган илк теннисчи ҳам бўлди. Унгача бу ишни Лондонда Энди Маррей бажарганди.

Янник Синнер кетма-кет 11 та учрашувда ғалаба қозонди. У охирги ўтказган 27 та учрашувидан 26 тасида зафар қучган. Финалдаги ғалаба у учун мавсумдаги 70-ғалаба бўлди. Бу энг яхши натижа ҳисобланади.  

Сайёрамизнинг биринчи ракеткаси Якуний ATP турниридаги муваффақиятли иштирокидан 4,9 миллион доллар ҳамда 1500 рейтинг очкоси ишлаб олди.