20 окт 15:27
Янгиликлар

Теннис

Йилнинг Якуний WTA турнирининг барча иштирокчилари маълум бўлди

Хитойда ўтказиладиган йилнинг Якуний WTA турнирининг сўнгги иштирокчиси ҳам аниқланди.

Швейцариялик Белинда Бенчич Якуний турнирдаги иштирокини нақд қилган саккизинчи теннисчига айланди. Бенчич бугун Москвада якунига етадиган "Кремль Кубоги"нинг финалига йўл олиш орқали сўнгги чиптани қўлга киритди.

Белиндага қадар Эшли Барти (Австралия), Каролина Плишкова (Чехия), Симона Халеп (Руминия), Бьянка Андрееску (Канада), Наоми Осака (Япония), Петра Квитова (Чехия) ва Элина Свитолина (Украина) ҳам Якуний турнир иштирокчисига айланишган эди.

Маълумот учун, йилнинг Якуний WTA турнири 27 октябрдан 3 ноябрга қадар Хитойнинг Шэньчжэн шаҳрида бўлиб ўтади. Элина Свитолина мусобақанинг амалдаги ғолибаси ҳисобланади. Украиналик теннис маликаси ўтган йилги финалда америкалик Слоан Стивенсни 3:6, 6:2, 6:2 ҳисобида мағлуб этганди.