Ёқуббоевда дуранг, таъқибчилар фарқни қисқартиришди

Айлана тарзда ўтказилаётган мусобақада 5 нафар халқаро гроссмейстер - Нодирбек Абдусатторов (2550, чемпионатнинг биринчи рақамли иштирокчиси), Сайдали Йўлдошев (2469), Марат Жумаев (2451), Алексей Барсов (2411) ва Тохир Воҳидов (2400) дона суряпти. 

Ўн биринчи турда ёш шахматчи чемпионат пешқадами Нодирбек Ёқуббоев қора доналарда ҳаракат қилиб, Саидакбар Сайдалиев билан дуранг ўйнади. Бундан яқин таъқибчилар унумли фойдаланиб қолишди. Никита Хорошев Абдумалик Абдусалимовни, мактаб ўқувчилари ўртасида жаҳон чемпиони Жавоҳир Синдаров эса Элбек Жумановни мағлубиятга учратди. 

Дунё тарихидаги энг ёш иккинчи халқаро гроссмейстер Нодирбек Абдусатторов бу сафар ҳам дуранг билан кифояланди. Абдусатторов тажрибали гроссмейстер Марат Жумаев билан муросага келди. Акмал Файзуллаев гроссмейстер Алексей Барсовни енгди.

Бугун ўтказиладиган 12-тур олдидан Нодирбек Ёқуббоев 11 имкониятдан 8 очко жамғариб, якка пешқадам бўлиб турибди. Қўшимча кўрсаткичларга кўра иккинчи ўринда бораётган Никита Хорошев ҳисобида 7 очко бор. Жавоҳир Синдаров ҳам 7 очко жамғарган. Марат Жумаев, Нодирбек Абдусатторов ва Тоҳир Воҳидов 6,5тадан очкога эга бўлиб турибди.