Ёш самбочиларимизнинг Жаҳон чемпионатидаги муваффақияти

Дунёнинг юзга яқин давлатидан истеъдодли самбочилар иштирок этган йилнинг ушбу нуфузли мусобақасида 22 нафар спортчидан иборат Ўзбекистон самбо терма жамоаси ҳам муносиб тарзда қатнашди.

Самбочиларимиз 2 та олтин, 3 та кумуш, 5 та бронза, жами 10 та медал билан умумжамоа ҳисобида иккинчи ўринни эгаллашди. Самбо спорт тури ватани ҳисобланган Россия терма жамоаси эса биринчи бўлди.

Ҳамюртларимиздан ўз вазн тоифаларида Мироншоҳ Султонов ва Клара Дерменбаева барча рақибларини мағлубиятга учратиб, жаҳон чемпионига айланишди.

Финалгача мағлубиятсиз етиб келган Нилуфар Раҳмонова, Шаҳзод Тагиев ва Жасурбек Маҳаматқулов кумуш медал билан тақдирланишди. Мадина Турғунбоева, Ибодатхон Агажанова, Мушарраф Ибодуллаева, Ойбек Усмонов ҳамда Фирдавс Хожимаматов бронза медалига сазовор бўлишди.