Ёзги биатлон. Мамлакат биринчилигида ғолиблар аниқланди

Мусобақада 100 нафарга яқин спортчилар ғолиблик учун кураш олиб боришди. 4000 метр масофада ўтган спринт баҳсларида фарғоналик Музаффар Мамасолиев финишга 15 дақиқа 35 сонияда етиб келди. Асосий рақобатчилари бўлган сурхондарёлик Виталий Сластён, самарқандлик Бунёд Мухиддиновлар ҳам кучли учликка киришди. 

Қизлар ўртасида 3000 метр масофада ўтган спринтда эса финишга самарқандлик Мадина Сагатова ҳамда Севара Чориевалар, уларнинг ортидан учинчи бўлиб пойтахт вилояти вакиласи Зуҳра Ҳалимова етиб келди.

Таъқиб этиш пойгасининг ўғил болалар ўртасидаги 6000 метр масофада ўтган пойгада яна кучли  учликка Музаффар Мамасолиев, Виталий Сластён, Бунёд Мухиддиновлар киришди. 

Қизлар ўртасида 5000 метр масофада ўтган пойгаларда Мадина Сагатова таъқибчиларини етиб олишига йўл қўймади. Иккинчи ўринга Зуҳра Ҳалимова кўтарилюи Фарғоналик Иродахон Олимова учинчи бўлди. 

Ўзбекистон чемпионати якунларига кўра Самарқанд вилояти вакиллари умумжамоа ҳисобида биринчи, Тошкент вилояти вакиллари иккинчи, Фарғоналик спортчилар эса учинчи ўринни эгаллашди.