Andijonda voleybol bo'yicha ayollar o'rtasida O'zbekiston chempionatining 1-tur o'yinlari yakunlandi

Musobaqa Andijon davlat tibbiyot instituti sport majmuasida tashkil etildi.

Bu yilgi musobaqada 7ta jamoa bahslarga kirishdi. Bular - amaldagi mamlakat chempionlari, O'zbekiston davlat jismoniy tarbiya va sport universitetining SKUF, "Namangan", "Xorazm", "Andijon", Nukus davlat pedagogika instituti, "JDPI-Ziyokor" (Jizzax davlat pedagogika instituti) hamda Farg'ona davlat universitetining "FarDU" jamoalaridir.

Musobaqada bu safar ham SKUF jamoasi raqiblaridan bir bosh ustun ekanligini ko'rsatdi va barcha o'yinlarda g'alabaga erishdi. Ular faqat Namangan viloyati voleybolchi qizlariga bir partiyani boy berdi, qolgan barcha o'yinlarda zafar quchib, 18 ochko bilan 1-tur bahslarida yuz foizlik natija qayd etishdi.

Musobaqa mezbonlariga o'z uyida devorlar ham yordam berdimi yoki jamoa haqiqatan sezilarli darajada kuchayganmi, xullas andijonlik voleybolchi qizlar SKUFga yutqazgan bo'lsa, qolgan barcha raqiblaridan ustunligini namoyish etdi. Ular 15 ochko bilan 2-o'rinni egallab turishibdi.

Namanganlik voleybolchilar esa to'rt g'alaba va ikki mag'lubiyat qayd etgan holda kuchli uchlikka yakun yasab turishibdi.

Keyingi pog'onalarni "NDPU", "JDPI-Ziyokor", "Xorazm" va FarDU jamoalari band etishgan.

Ertaga erkaklar jamoalari Navoiy shahrida to'planishadi va 9 martdan bu erda O'zbekiston XXIX chempionati bahslariga start beriladi.