Boks. O'zbekiston chempionatidagi janglardan onlayn yakunlandi

Ushbu sahifa orqali bugun o'tkaziladigan barcha janglar natijalarini kuzatib borishingiz mumkin bo'ladi. 

YANGILASH

75 kg. Odiljon Aslanov Akmalbek Qosimovga qarshi ringga ko'tarilib, g'alaba qozondi

60 kg. SHunqor Abdurasulov Jahongir Davidovga qarshi jang qilib, 5-0 hisobida g'alaba qozondi.

69 kg. Bobousmon Baturov Jahongir Rasulovga qarshi ringga ko'tarilib, 5-0 hisobida g'alaba qozondi va keyingi bosqichga yo'l oldi.

75 kg. Fanat Qahramonov Toshkent viloyati vakili Zokirxo'ja Madievga qarshi ringga ko'tarilib, g'alaba qozondi.

-69 kg vazn toifasidagi janglarning birida andijonlik Javlonbek Yo'ldoshev Toshkent shahri vakili Temur Saidovni 5:0 hisobida dog'da qoldirdi. 

Kutilmagan natija -52 kg vazn toifasidagi chorak final jangida qayd etildi. CHempionlik uchun asosiy davogarlardan hisoblangan Abrorjon Qodirov kutilmaganda andijonlik SHahzodbek Tolibjonovga 1:4 hisobida imkoniyatni boy berib qo'ydi.

-60 kg vazn toifasida yoshlar o'rtasida jahon chempioni, o'smirlar Olimpiadasi g'olibi Abdumalik Halakov navbatdagi g'alabasiga erishdi. U farg'onalik Bahromjon Olimjonovni engdi va yarim finalga yo'l oldi. Abdumalik o'tgan yili O'zbekiston chempioni bo'lish barobarida musobaqaning "eng yaxshi jangchisi"ga beriladigan Rufat Risqiev sovrinini ham qo'lga kiritgan edi.

V ringda o'g'il bolalar o'rtasidagi janglar boshlandi. O'ziga xos Farg'ona viloyati derbisida Athamjon Muhiddinov Husanboy Karimovni taslim etdi. 

Osiyo chempioni Nodirjon Mirzaahmedov chorak final jangida jizzaxlik Elmurod Normurodovni mag'lub etdi va yarim final yo'llanmasini qo'lga kiritdi.   

SHunga o'xshash holat V ringda ham kuzatildi.  Navoiylik Dildora Saydullaeva jangsiz final chiptasini qo'lga kiritdi. Namanganlik Nigora Rayimboeva ringga chiqmadi. Dildora oltin medal uchun ringga ko'tariladi. SHu tariqa, qizlar o'rtasidagi kunning birinchi yarmiga belgilangan yarim final janglari o'z nihoyasiga etdi.  

Qashqadaryolik Mavluda Mavlonova ham avtomatik tarzda keyingi bosqich yo'llanmasini qo'lga kiritdi. Uning navoiylik raqibasi Madina Yusupova jarohati sababi jangni o'tkaza olmadi.   

A ringdagi navbatdagi jang o'tkazilmadi. Boisi, Navbahor Hamidovaning raqibasi jizzaxlik Iroda Azimova ringga chiqmadi va buning natijasida Navbahor jangsiz keyingi bosqichga yo'l oldi.   

"Dinamo" sport jamiyati sportchisi, terma jamoa azosi Rayxona Qodirova buxorolik Ziyoda Yarashevaga hech qanday imkoniyat qoldirmadi.   

Kunduzgi dasturdan o'rin olgan janglar qizg'in pallaga kirib bormoqda. A ringda surxondaryolik Mahliyo Ravshanova samarqandlik Malikabonu Egamqulovadan 5:0 hisobida ustun keldi. Yana bir Surxondaryo viloyati vakilasi Dilfuza Bekova esa SHohida Rahimani mag'lubiyatga uchratdi.

Hozirgina V ringdagi yana bir jang yakunlandi. Bu safar muddatidan avval g'alaba qayd etildi. Andijon viloyati vakilasi Aziza Yoqubova dugonasi Nozimaxon Bulturovani birinchi raunddayoq nokautga uchratdi.  

V ringdagi ilk jangda esa buxorolik Marjona Savrieva qoraqalpog'istonlik Azima Tojiboevani 5:0 hisobida engdi.  

Hozirgina A ringdagi jang yakunlandi. Unda -48 kg vazn toifasida terma jamoa azosi, namanganlik Gulasal Sultonalieva buxorolik dugonasi Farzona Fozilovani 5:0 hisobida mag'lubiyatga uchratdi.   

Ayni paytda A va V ringlarida kunduzgi dasturdan o'rin olgan janglar boshlandi. Har ikki ringda hozirgina ikkinchi raund o'z yakuniga etdi. Birozdan so'ng kunning ilk g'oliblarini bilib olamiz. 

Assalomu alaykum. O'zbekiston chempionati beshinchi kunidan matnli translyaciyani boshlaymiz. 

Janglar soat 11:00da boshlanadi.

Bugun o'tkaziladigan janglar ro'yxati: