2023 yil paradzyudo bo'yicha nufuzli xalqaro musobaqalardan biri O'zbekistonda o'tishi kutilmoqda

Bugun Osiyo Paralimpiya qo'mitasi vice-prezidenti – O'zbekiston Milliy paralimpiya qo'mitasi raisi Muxtorxon Tashxodjaev IBSA ko'zi ojizlar dzyudo federaciyasi sport direktori Yanosh Tardos bilan uchrashdi. SHuningdek, uchrashuvda O'zbekiston dzyudo federaciyasi raisi Aziz Kamilov ham ishtirok etdi.

Samimiy kechgan suhbat davomida tomonlar o'zaro hamkorlik masalalarini yaqindan muhokama qilishdi.

Jumladan, Muxtorxon Tashxodjaev IBSA tomonidan para dzyudo bo'yicha ko'plab ijobiy o'zgarishlar amalga oshirilayotganini takidlab, so'nggi paytlarda O'zbekistonda ham ko'zi ojiz insonlar o'rtasida para dzyudo sport turiga qiziquvchilar soni tobora ortib borayotganini bildirdi. Bundan tashqari, yurtimizda xalqaro toifadagi klassifikatorlarga ehtiyoj yuqori ekani bois, bu borada IBSA bilan hamkorlikda o'zbekistonlik mutaxassislarni ham xalqaro toifadagi klassifikator sifatida tayyorlash bo'yicha taklif bildirdi.  Bundan tashqari, O'zbekistonda para dzyudo bo'yicha nufuzli xalqaro musobaqalarni o'tkazish masalasida ham fikr almashildi.

O'z navbatida Yanosh Tardos ham o'zbekistonlik para dzyudochilar dunyoda kuchlilar qatorida etirof etilishini aytib, ushbu yutuqlar mamlakatimizda yaratilgan ulkan imkoniyatlar natijasi ekanini bildirdi. U IBSA hamda O'zbekiston Milliy paralimpiya qo'mitasi o'rtasidagi hamkorlikni yangi bosqichga olib chiqishga va har tomonlama qo'llab-quvvatlashga tayyorligini malum qildi.