Alisher Alimov: "Sankt-Peterburgdagi musobaqa biz uchun har tomonlama foydali bo'ladi"

Bahslar Rossiya Federaciyasining Sankt-Peterburg shahrida tashkil etiladi. Ushbu musobaqa oldidan O'zbekiston sambo assiciaciyasi raisi Alisher Alimov o'z fiklarini bildirdi. 

"19 avgust kuni terma jamoa azolari bilan birga Rossiyaga yo'l olamiz. Musobaqa 7 ta vazn toifasida o'tkaziladi va unda 6 nafar hamyurtimiz ishtirok etadi. 

Qayd etish lozimki, musobaqada qatnashish uchun Xalqaro sambo federaciyasidan taklifnoma kelgan. Ular bizning 6 nafar sportchimizni bahslarda qatnashishga loyiq ko'rishibdi. Bu bizni xursand qilmasdan qolmaydi. 

Bellashuvlarda 21 mamlakatdan sportchilar qatnashadi. Yana bir muhim jihati, turnir yakuniga ko'ra chempion bo'lgan sportchilar 10 ming dollarni qo'lga kiritishadi. Kumush va bronza medali sohiblari esa mos ravishda 7 ming va 5 ming dollarga ega chiqishadi. 

Yaxshi bilasiz, noyabr oyida Toshkent shahrida jahon chempionati o'tkaziladi. Ushbu turnir orqali sportchilarimizning holatini yana bir marotaba ko'zdan kechirib olamiz. SHuningdek, sambochilarimizning asosiy raqiblarini ham ko'rib olish imkoniyatimiz bo'ladi.

SHu kabi jihatlarni inobatga olgan holda aytishim mumkinki, Sankt-Peterburgdagi musobaqa biz uchun har tomonlama foydali bo'ladi", - dedi Alisher Alimov O'zbekiston sambo associaciyasi matbuot xizmatiga bergan intervyusida.