“Alpomish”da alplar kurashi boshlandi FOTOGALEREYA

Turnir reglamentiga muvofiq,  barcha mehmonlar erta tongdan kunni dastlab buyuk alloma Al Hakim at Termiziy qabrini ziyorat qilishdan boshladi. Ziyorat davomida mehmonlarga dasturxon yozilib, ehson oshi tortildi. Ziyorat bog'i hududida kurash bo'yicha mahorat darslari ham uyushtirildi.

Etiborlisi, ushbu mahorat darslarini xorijlik polvonlar boshlab berishdi. Faxriy polvonlar ishtirokidagi ko'rgazmali chiqishlar ham  kurashning jozibasini yaqqol namoyish etishdi.

Takidlash joiz, Al Hakim at-Termiziy islom olamining buyuk Termiziy taxallusi bilan dong taratgan. Hakim nomi bilan mashhur bo'lgan ushbu allomaning to'liq ismi Abu Abdulloh Muhammad ibn Ali Ibn Hasan, ibn Bashir Hakim Termiziy bo'lgan.

Kunning ikkinchi yarmida Termizdagi imom Termiziy xalqaro ilmiy tadqiqot markazida OAV vakillari uchun matbuot anjumani tashkil etildi.

Anjumanda Surxondaryo viloyat hokimi To'ra Bobolov, Bosh vazir o'rinbosari, O'zbekiston turizm va sport vaziri Aziz Abduhakimov, Xalqaro kurash associaciyasi prezidenti Haydar Farmon ishtirok etdi.

Matbuot anjumanida jurnalist va blogerlar kurashning xalqaro miqyosdagi rivoji va boshqa ko'plab savollariga javob olishdi. Anjuman davomida kurashga oid turli takliflar ham o'rtaga tashlandi.

SHundan so'ng barcha ishtirokchilar “Alpomish” stadioni tomon yo'l olishdi. Soat 16:00 dan boshlab xalqaro turnirga start berildi. Erkaklar 81, 90 kg. vaznlarda kuch sinashishayotgan bo'lishsa,  ayollar 48, 57. 63, 70 kg. vazn toifalariga ko'ra bellashishmoqda.  

Alimurod Mamadaminov, Ilhom Rahmonov Termiz shahridan