Andijonda sportning rivojlanish holati ishchi guruh etiborida

Sport vazirligi va MOQ mutasaddilarining navbatdagi manzili Andijon viloyati bo'ldi. Rasmiylarga viloyat hokimi SHuhratbek Abduraxmanov hamrohlik qildi.

Dastlab ishchi guruh Andijon shahridagi “Universal” sport majmuasiga tashrif buyurdi. Butkul yangicha qiyofa ochgan arena joriy yil futzal bo'yicha jahon chempionatining 8 ta uchrashuviga mezbonlik qildi. Hozirgi kunda majmuada jamoaviy sport turlari bilan shug'ullanish uchun qulay imkoniyat mavjud. Mutasaddilar o'rganish ishlari davomida mazkur jihatni ham inobatga olgan holda yirik musobaqalarga tayyorgarlik ko'rishda ushbu arena imkoniyatlaridan foydalanish, qolaversa, unda Respublika va xalqaro miqyosdagi musobaqalarni o'tkazish borasidagi takliflarni ilgari surishdi. Bundan tashqari, Baliqchi va Asaka tumanlaridagi BO'SM va IBO'SMlarning ham faoliyati o'rganildi.

SHundan so'ng viloyatdagi asosiy sport talim muassasasi bo'lgan Andijon Olimpiya va Paralimpiya sport turlariga tayyorlash markazi ishchi guruh etibor markazida bo'ldi. Rasmiylar markazda tahsil olayotgan yoshlarning dars jadvallari va ularga yaratilgan sharoitlar bilan batafsil tanishishdi. SHundan so'ng viloyat hokimligi, sport boshqarmasi hamda federaciyalarning hududiy vakillari bilan yig'ilish o'tkazildi. Unda Andijon boks maktabining shuhratini yanada yuksaltirish, bir paytlar viloyatda Sobiq Ittifoq miqyosida katta mavqega ega bo'lgan chim ustida xokkey sportini tiklash borasida ham so'z bordi.

Andijon viloyatining yangi Olimpiya sikliga tayyorgarlik rejasi tahlil qilingan ushbu suhbatda Los-Anjeles-2028 yozgi Olimpiya o'yinlariga hozirlik ko'rish borasida kompleks choralar muhokama qilindi. Yakunda hududiy vakillarning mavzu yuzasidan takliflari o'rganilib, oliy sportdagi natijalarni oshirish bo'yicha vazifalar belgilab olindi.