Australian Open. Erkaklar o'rtasidagi yakkalik turnirida chempion aniqlandi

Mukofot jamg'armasi deyarli 60 million AQSH dollarini tashkil etgan musobaqaning so'nggi bahsi erkaklar o'rtasidagi yakkalik final uchrashuvi bo'ldi. Unda dunyoning birinchi va ikkinchi raketkalari - Australian Open turnirining amaldagi chempioni italiyalik Yannik Sinner hamda germaniyalik Aleksandr Zverev o'zaro to'qnash keldi. 

Ikki soatu 45 daqiqa davom etgan bahsda dunyoning birinchi raketkasi Yannik Sinner 6/3, 7/6(4), 6/3 hisoblarida g'alaba qozonib, chempionlik unvonini muvaffaqiyatli tarzda himoya qildi. Tennischilarning o'zaro uchrashuvlarida hamon Zverev oldinda bormoqda - 4:3.

Final uchrashuvi statistikasi:

Yannik Sinner - 6 ta eys, 2 ta qo'shxato, 2 ta breyk

Aleksandr Zverev - 12 ta eys, 2 ta qo'shxato, breyk yo'q

Yannik ketma-ket 22 ta uchrashuvda Top-10 reytingidan o'rin olgan raqiblari ustidan g'alaba qozondi. Bu XXI asr rekordi hisoblanadi. 2006-2007 yillarda Rojer Federerda bu ko'rsatkich 20 ta uchrashuvni tashkil qilgandi. 

Sinner ikki haftalik mehnatidan 2000 reyting ochkosi va 3 500 000 Avstraliya dollari (taxminan 2,2 mln AQSH dollari), Zverev esa 1300 ochko hamda 1 mln 900 ming Avstraliya dollari ishlab oldi.