Bektemir Meliqo'ziev: Raqibim aniq bo'ldi, jang manzili ham

Unga ko'ra, WBA Continental Americas chempionlik kamari sohibi 14 fevral kuni Kaliforniyada ringga ko'tariladi. Bu haqida charm qo'lqop ustamizning o'zi bizga xabar berdi. 

"Jangim 14 fevral kuniga belgilangan edi. Lekin shu kungacha raqib nomi aniq emasdi. Jamoam bir necha bokschilar bilan muzokara olib borayotgandi. Yakunda meksikalik Marko Antonio Periban bilan kelishuvga erishildi. Hozirda bo'lajak jangga jiddiy tarzda hozirlik ko'rayapman", - dedi Meliqo'ziev.

Malumot uchun, Marko Antoni Periban prof ringda 31ta jang o'tkazgan bo'lib, ularning 25tasida g'alaba qozongan. Raqiblarini 16ta jangda nokautga uchratgan. Hisobida 5ta mag'lubiyat va bitta durang bor. O'zi ham ikkita jangda nokaut uchragan. 

Eslatib o'tamiz, WBA reytingida 15-o'rinni egallab turgan Meliqo'ziev o'zining so'nggi jangini 14 dekabr kuni AQSHda mezbon bokschi Vaugin Aleksanderga qarshi o'tkazgandi. O'n raundlik jangda hamyurtimiz hakamlarning qarori bilan 100:90, 100:90, 100:90 hisoblarida g'alaba qozonib, WBA Continental Americas kamari sohibiga aylangandi. Peribanga qarshi jang Bektemir uchun faoliyatidagi beshinchisi bo'ladi.