Bel olish va uch kurash bo'yicha 2021 yilning ilk chempionlari aniqlandi

O'zbekiston Respublikasi Jismoniy tarbiya va sport vazirligi hamda O'zbekiston Bel olish va uch kurash associaciyasining yillik-taqvim rejasidagi mazkur mamlakat chempionatida  Qoraqalpog'iston Respublikasi, Toshkent shahri va barcha viloyatlardan 600 nafarga yaqin yosh polvonlar g'oliblik uchun kurash tushishdi.

Musobaqa reglamentiga muvofiq, dastlab kattalar va 2004-2005 yillarda tug'ilgan o'smirlar va qizlar bel olishning xalqa-chalish, xalqa-chalishsiz yo'nalishlarida belgilangan vazn toiflariga ko'ra kuch sinashishdi.

Bel olish bo'yicha bellashuvlar yakuniga etgach, kuchli uchlikdan joy olgan sportchilar munosib taqdirlanishdi.

Musobaqa reglamentiga muvofiq, oradan bir kun o'tib, bel olish va uch kurashning uch kurash bo'yicha musobaqasiga navbat berildi.

Murosasiz va yuqori saviyada o'tgan mazkur uch kurash bo'yicha ham belgilangan yo'nalishlar bahslarida 2004-2005 yillarda tug'ilgan o'g'il bolalar o'rtasida Maruf Boltaboev (Andijon), Sardorbek Komilov (Andijon), Javoxir Egamberdiev (Xorazm), Jasur Xolmurodov (Surxondaryo), Otabek Xolmirzaev (Toshkent v.), kattalar o'rtasida Umidjon SHaropov (Jizzax), Nurmuhammad Abdullaev (Farg'ona), Abduhakim Mahmudov (Toshkent sh.), Muhammadkarim Karimov (Farg'ona), Anvar Xudoyqulov (Samarqand), Asilbek Abduraimov (Samarqand) kabi polvonlar o'z vazn toifalariga ko'ra, chempionlikni qo'lga kiritib, shohsupadan joy olishga muvaffaq bo'lishdi.

O'zbekiston chempionati bellashuvlari yakuniga etgach, 2021 yilning dastlabki g'olib va sovrindorlari associaciya tomonidan diplom, medal va esdalik sovg'alari bilan mukofotlanishdi.