06 apr 08:04
Yangiliklar

Kurash

Bel olish va uch kurashning yaktakli yo'nalishi bo'yicha chempionlar aniqlandi

Farg'ona tumanining CHimyon shaharchasidagi 2-sonli bolalar-o'smirlar sport maktabida Bel olish va uch kurash bo'yicha 2006-2007 yillarda tug'ilgan o'g'il bolalar va qizlar o'rtasida O'zbekiston chempionati bo'lib o'tdi.

O'zbekiston Respublikasi Jismoniy tarbiya va sport vazirligi hamda O'zbekiston Bel olish va uch kurash associaciyasining yillik taqvim-rejasidagi mazkur mamlakat chempionatida Qoraqalpog'iston Respublikasi, Toshkent shahri va barcha viloyatlardan 400 nafardan ortiq yosh polvonlar Bel olish va uch kurashning yaktakli yo'nalishi bo'yicha g'oliblik uchun kuch sinashishdi.

Yakuniy natijalarga ko'ra, Farangiz Qo'shaqova (Andijon), Doston Mamadaliev (Jizzax), Bexruzbek Abdualiev (Sirdaryo), Otabek Sobirov (Xorazm), Mirzohid Zokirov (Namangan), Husanboy Abduvaliev (Farg'ona), Javohir Norboev (Surxondaryo), Alisher Yusupov (Toshkent v.), Durdona Mamurjonova (Sirdaryo) kabi bir qator iqtidorli va yosh sportchilar o'z vazn toifalarida barcha raqiblaridan ustun kelib, faxrli birinchi o'rinlarga ega bo'lishdi.

Bellashuvlar so'nggida g'olib va sovrindorlar diplom, medal va esdalik sovg'alari bilan mukofotlanishdi.

Ushbu musobaqa dastur-rejasiga muvofiq, 7 apreldan 2006-2007 yilda tug'ilgan sportchi-o'quvchilar o'rtasida uch kurashning yaktaksiz yo'nalishi bo'yicha bellashuvlarga start beriladi.