Belbog'li kurash. Bog'dodda O'zbekiston kubogi bellashuvlari o'tkazilmoqda

O'zbekiston Respublikasi Turizm va sport vazirligi hamda O'zbekiston belbog'li kurash federaciyasining yillik – taqvim rejasidagi mazkur mamlakat kubogi bahslarida  Qoraqalpog'iston Respublikasi, Toshkent shahri va  viloyatlardan  300 nafarga yaqin  yosh polvonlar g'oliblik uchun kurash tushishmoqda. Mazkur kubok bahslarida dastlab, musobaqaning tantanali ochilish marosimi tashkil etildi. Marosimda Bog'dod tumani hokimi Vosiljon Nazarov, Farg'ona viloyati Turizm va sport bosh boshqarmasi boshlig'i o'rinbosari SHerzod O'sarqulov, O'zbekiston belbog'li kurash federaciyasi bosh kotibi Abdixalil Malikov, belbog'li kurash bo'yicha kattalar o'rtasida terma jamoa bosh murabbiyi, xalqaro toifadagi hakam Azamjon SHokirjonovlar ishtirok etib, yosh polvonlarni qutlab, ularga omad tilashdi.   

Yuqori saviyada tashkil etilgan ushbu mamlakat kubogida o'g'il bolalar belbog'li kurashning erkin va klassik yo'nalishlarida 11 ta vazn toifasida, qizlar esa erkin yo'nalishda 7 ta vazn toifasida g'oliblik uchun kurash tushishmoqda.

Bellashuvlar yakuniga etgach, kuchli uchlikdan joy olgan polvonlar bilan tanishishingiz mumkin. Musobaqa 10 oktyabrga qadar davom etadi.    

Ilhom RAHMONOV tayyorladi