16 okt 12:51
Yangiliklar

Kurash

Belbog'li kurash. G'oliblar Respublika bosqichida

CHiroqchi tumanidagi 1-sonli bolalar-o'smirlar sport maktabida belbog'li kurash bo'yicha 2006-2007 yillarda tug'ilgan o'g'il bolalar va qizlar o'rtasida viloyat saralash bellashuvlari bo'lib o'tdi.

Qashqadaryo viloyat jismoniy tarbiya va sport boshqarmasi, viloyat belbog'li kurash federaciyasi, tuman 1-BO'SM tashabbusi bilan tashkil etilgan mazkur musobaqada viloyatning SHaxrisabz, Yakkabog', Mirishkor, Kitob, Qamashi, Qarshi, CHiroqchi kabi tuman va shaharlaridan 180 nafar yosh polvonlar belbog'li kurashning erkin va klassik usullarida o'zaro kuch sinashishdi.

Kun davomida o'tgan bahslarning yakuniy natijalariga ko'ra, o'z vazn toifalarida g'olib va sovrindor bo'lgan sportchi-o'quvchilar viloyat belbog'li kurash federaciyasi hamda 1-BO'SM tomonidan diplom, medal va esdalik sovg'alari bilan mukofotlanishdi.

Musobaqada shohsupadan joy olgan polvonlar 18-19 oktyabr kunlari Namangan viloyatining Namangan tumanida o'tkaziladigan O'zbekiston chempionati yo'llanmasiga ham ega bo'lishdi.