Belbog'li kurash. To'raqo'rg'onda "Do'stlik" turniri o'tkaziladi

Namanganda ayni 65- xalqaro gullar festivali doirasida bo'lib o'tgan mazkur "Do'stlik" xalqaro turnirida Rossiya, Hindiston hamda mamlakatimizning eng nomdor polvonlari o'zaro kuch sinashishdi.
To'raqo'rg'on tuman sport maktabida yuqori saviyada o'tgan mazkur xalqaro turnirda dastlab tantanali ochilish marosimi tashkil etildi. Marosimda Namangan viloyati hokimi o'rinbosari Otabek Bozorov, To'raqo'rg'on tuman hokimi, viloyat belbog'li kurash federaciyasi raisi SHerali Qosimov, Osiyo belbog'li kurash konfedraciyasi prezidenti Mo'min Muratov, O'zbekiston belbog'li kurash federaciyasi raisi Ravshan Dastirov hamda Rossiya va Hindiston sport delegaciyalari rahbarlari ishtirok etishdi.

Kun davomida ko'p sonli muxlislar olqishi ostida o'tgan bellashuvlarda polvonlar bor mahoratlarini ishga solib, g'oliblik uchun murosasiz kurash olib borishdi.Har bir vazn toifasida sovrindorlar safidan joy olish polvonlar uchun oson kechmadi. SHu tariqa shiddatli kechgan bellashuvlarning yakuniy natijalariga ko'ra, umumjamoa hisobida eng ko'p medallar jamg'argan O'zbek polvonlari faxrli birinchi o'rinni qo'lga kiritishdi. Rossiya terma jamoasi ikkinchi o'rinni egallagan bo'lsa, hindistonlik polvonlarga uchinchi o'rin nasib etdi.

G'olib va sovrindorlar diplom, medal va qimmatbaho esdalik sovg'alari bilan taqdirlanishdi.

Takidlash joiz, sportchilarni kurash maydoniga chorlagan ushbu xalqaro turnirdan ko'zlangan maqsad—Yurtimizda sportni, xususan, milliy sport turimiz belbog'li kurashni yanada rivojlantirish, milliy qadriyatlarimizni asrab avaylash va xalqaro do'stlik rishtalarini mustahkamlashdan iborat.

Ilhom RAHMONOV tayyorladi