Belbog'li kurash: Yozyovonda O'zbekiston chempionati o'tkazilmoqda

Bugun, 24 iyun kuni  Farg'ona viloyati Yozyovon tumanining Xonabod qishlog'ida tuman bolalar-o'smirlar sport maktabiga qarashli  ochiq kurash maydonida belbog'li kurash bo'yicha 2007-2008 yillarda tug'ilgan o'g'il bolalar va qizlar o'rtasida O'zbekiston chempionati bellashuvlariga start berildi.

O'zbekiston Respublikasi  Sportni rivojlantirish vazirligi hamda O'zbekiston belbog'li kurash federaciyasining yillik – taqvim rejasidagi mazkur mamlakat chempionati bahslarida  Qoraqalpog'iston Respublikasi, Toshkent shahri va barcha  viloyatlardan  300 nafardan ortiq  yosh polvonlar g'oliblik uchun kurash tushishmoqda. CHempionat bahslarida dastlab, musobaqaning tantanali ochilish marosimi tashkil etildi. Marosimda Yozyovon tumani hokimi o'rinbosari Mirzohid Hatamov,  O'zbekiston belbog'li kurash federaciyasi raisi o'rinbosari, O'zbekistonda xizmat ko'rsatgan sport ustozi Azamjon SHokirjonov, belbog'li kurash federaciyasi kengashi azosi, "El-yurt hurmati" ordeni sohibi Nematullo To'ychiev, Farg'ona viloyat  belbog'li kurash federaciyasi ijrochi direktori Miranshoh Ro'ziev, tuman BO'SM direktori Muzaffar Karimov va boshqalar ishtirok etib, musobaqa qatnashchilarini qutlashdi va ularga omad tilashdi.   

Yuqori saviyada tashkil etilgan ushbu chempionatda o'g'il bolalar belbog'li kurashning erkin va klassik yo'nalishlarida 11tadan vazn toifasida, qizlar esa erkin yo'nalishda 7 ta vazn toifasida g'oliblik uchun kurash tushishmoqda. Bellashuvlarni belbog'li kurash federaciyasi hakamlar hayati raisi Toshkentboy Yaxshiboev boshchiligidagi 20 nafar malakali hakamlar guruhi boshqarib borishmoqda.

Musobaqa 26 iyunga  qadar davom etadi.    

Ilhom RAHMONOV tayyorladi