Berdimuratov finalda, Ortiqboev jahon chempionati sovrindori!

Dunyo birinchiligi yunon-rum kurashi bahslari bilan boshlangan edi. Hamyurtimiz Jasurbek Ortiqboev jahon chempionatining bronza medalini qo'lga kiritdi. 55 kg vazn toifasida yurtimiz sharafini himoya qilgan vakilimiz bronza medali uchun kechgan bellashuvda qozog'istonlik Amangali Bekbolatovdan 9-5 hisobida ustun keldi. 

Quvonarlisi, 82 kg vaznda kurashgan Jalgasbay Berdimuratov bugun jahon chempionatining oltin medali uchun gilamga chiqish huquqini qo'lga kiritdi. Tokio Olimpiadasi ishtirokchisi, Islom birdamligi o'yinlari g'olibi ilk davrada qozog'istonlik Dias Kalen, 1/8 finalda xitoylik Vong CHengvu, 1/4 finalda ozarbayjonlik Rafig Huseynov, 1/2 finalda esa vengriyalik Tamash Levaini mag'lubiyatga uchratdi. Bugun Berdimuratov jahon chempionligi uchun kechadigan final bahsida turkiyalik Burxan Akbudakka qarshi gilamga chiqadi.     

Hamyurtlarimizdan 63 kg vaznda kurashgan To'rabek Tirkashev ilk davradayoq xorvatiyalik Ivan Lizatovichsha 1-8, 67 kg vazndagi Abror Atabaev 1/8 finalda gruziyalik Joni Xecurianiga 1-4, 72 kg vaznda gilamga chiqqan Mirzobek Rahmatov ilk bosqichda finlyandiyalik Lisakki Lipastiga, Aram Vardanyan (77 kg) koreyalik Xyun Vu Kimga 0-6, Nurbek Xoshimbekov (87 kg) birinchi davrada bolgariyalik Yoan Dimitrovga 0-5, Rustam Assakalov (97 kg) 1/4 finalda eronlik Abdulloh Saraviga 0-7 hisobida imkoniyatni boy berib qo'ydi.