BNP Paribas Open. "O'zbek derbisi" yakuniga etmay qoldi

Xabar berganimizdek, ushbu nufuzli turnirda mamlakatimizning birinchi va uchinchi raketkalari Kamilla Rahimova hamda Mariya Timofeeva ham muvaffaqiyatli start olgandi. Ikkala tennischimiz ham raqibalarini ortiqcha qiyinchiliksiz, bir xil - 6/2, 6/2 hisoblarida mag'lub etishgan edi.

Kecha tunda asosiy to'rga yo'llanma beruvchi saralash turnirining final uchrashuvida ular bir-birlariga qarshi kortga chiqishdi. Birinchi set 6/4 hisobida Timofeeva foydasiga hal bo'ldi. Ikkinchi setni 4/5 hisobida yutqazayotgan Mariya uchrashuvni davom ettira olmasligini malum qildi va natijada saralash bahslarida ettinchi raqam ostida tasniflangan Rahimova musobaqaning asosiy to'riga yo'llanmani qo'lga kiritdi. Bunda Kamillaga omad ham kulib boqdi.  

Bu tennischilarimizning o'zaro o'tkazgan ikkinchi uchrashuvi bo'ldi. Ular ishtirokidagi ilk bahs 2024 yilning 24 avgustida AQSHdagi turnirda bo'lib o'tgan va unda Rahimova 6/3, 6/0 hisobida g'alaba qozongan edi.   

Taqqoslash uchun, Kamilla Rahimova ayni paytda dunyoning 88-raketkasi bo'lib turibdi. Mariya Timofeeva esa WTA reytingida 156-pog'onadan joy olgan. Endi Rahimova asosiy to'rning ilk davrasida reytingda 165-o'rinni egallab turgan kanadalik Byanka Andreeskuga qarshi kortga chiqadi.