BNP Paribas Open. Rahimova 1/32 finalga yo'l oldi. Endi uni dunyoning to'rtinchi raketkasi kutmoqda!

Xabar berganimizdek, ushbu nufuzli turnirda mamlakatimizning birinchi raketkasi Kamilla Rahimova ham ishtirok etyapti. Asosiy to'r bahslariga saralash turniridagi ikki g'alabasi evaziga etib kelgan Rahimovaning muvaffaqiyatli odimi davom etdi. U asosiy to'rning ilk davrasida reytingda 165-o'rinni egallab turgan kanadalik Byanka Andreeskuga qarshi kortga chiqdi. Ikki soatu 19 daqiqalik uchrashuvda Kamilla dunyoning sobiq to'rtinchi raketkasini uch set natijasiga ko'ra mag'lubiyatga uchratdi - 6/7(6), 6/0, 6/1.       

Taqqoslash uchun, Rahimova ayni paytda dunyoning 88-raketkasi bo'lib turibdi. 25 yoshli Byanka bahs davomida 12, 24 yashar Rahimova esa 1 ta eys zarbasini amalga oshirgan. Qo'shxatolar kanadalikda bittaga ko'proq bo'ldi - 5 ga 4. Bu tennischilarning o'zaro o'tkazgan ilk uchrashuvi bo'ldi.   

Eslatib o'tamiz, Rahimova saralashning final uchrashuvida O'zbekistonning uchinchi raketkasi Mariya Timofeevani omad tufayli mag'lubiyatga uchratgandi. Birinchi set 6/4 hisobida o'z foydasiga hal bo'lgan Timofeeva ikkinchi setni 4/5 hisobida yutqazayotgan bir paytda jarohat olib, kurashni to'xtatgandi. 

Ertaga Kamilla Rahimovani jiddiy sinov kutib turibdi. Vakilamiz 1/32 final uchrashuvida dunyoning to'rtinchi raketkasi, amerikalik Kori Goffga qarshi kortga chiqadi. Bu tennischilarning o'zaro o'tkazadigan uchinchi uchrashuvi bo'ladi. Avvalgi har ikki bahsda Goffning qo'li baland kelgan.