Bobur Qurbonov: "Odilxonga omad tilaganim bilan, uning g'alabasiga ishonmagandim"

"SHaxsiy hayotga o'tmasdan toza treshtok qilganliklari uchun jangchilarga rahmat aytishimiz kerak. Haqiqiy treshtok jangga qiziqishni qay darajada oshirishining guvohi bo'ldik. Avvalroq, Xolmurod va Lazizxon misolida buni ko'rgan edik. 

Jangga keladigan bo'lsak, 99 foiz odam Odilxonga imkoniyat bermagan edi. SHu qatorda o'zim ham Odilxonga omad tilaganim, uning g'alabasini xohlaganim bilan miyamda ishonmagandim. CHunki Erkabulanda bo'y va vazn yuqori, qo'l zarbalari kuchli, kurashga qarshi yaxshi himoylangan, xullas, texnik jihatdan ham jismoniy taraflama ham Toktar ustun degan edim. 

Yodingizda bo'lsa jonli efirda aytgan edim, Odilxonda portlovchi kuch bor, kutilmaganda kutilmagan hodisa qila oladi deb. Zalga kelganida ko'rgan edim - har qanday holatda ham pozitiv xarakterni saqlab qola oladi. G'alabaga bo'lgan ishonch turadi. 

Nazarimda, Erkabulan jangga 2 daqiqalik reja bilan chiqqan. CHiqaman, urib yiqitaman, deb o'ylagan. Urdi, yiqilmadi. Bunga javoban, Odilxon 2-raundda kuchli zarbalar bilan qarshilik ko'rsatdi, Toktarning rejasini ish bermaganidan keyin u ruhan cho'kdi. Odilxonni ishonchi yana ham oshdi va g'alaba shuning ortidan keldi. 

Bu esa bizga MMAning qanchalik kutilmagan hodislarga boy sport ekanligini, raqibni mensimaslik nimaga olib kelishini, raqibni jangga bo'lgan ishonchini, bilimlarini hurmat qilish kerakligini isbotlab berdi. 

Odilxonga omad tilayman, to'xtab qolmaslik kerak, Erkabulan uning faoliyatidagi eng jiddiy raqiblardan biri bo'ldi. Bundan keyin faqat kuchli jangchilar, o'ziga ishongan va Odilxonni engga olaman degan sportchilar paydo bo'ladi. O'zbekistonda MMAning shov-shuv bo'lgani uchun Odilxonga ham Erkabulanga ham rahmat aytaman. Odilxonga omad, jangchi yuragi ko'p narsaga qodir, faqat unga ishonish kerak", - dedi Qurbonov.