Bogdan Guskov UFC'da o'zi jang qilishni istaydigan raqiblar nomini aytdi. Ular orasida sobiq raqibi va qiyofadoshi ham bor

U kuzda janglarga qaytmoqchi.

"Dominik Reyes, Entoni Smit bilan jang qilmoqchiman. SHuningdek, Volkan Ozdemir bilan revansh jangini o'tkazishni xohlardim. Ammo endi g'alabadan so'ng u kuchli beshlikka ko'tarildi, shuning uchun bu mendagi eng noreal variant bo'lsa kerak. Lekin u kamar yo'lida ekani uchun qiziq, men u bilan to'liq tayyorgarlikda o'z kuchimni sinab ko'rmoqchiman. Endi men bunga yaxshiroq tayyorgarlik ko'rishim mumkin va bizning jangimiz yanada qiziqarli bo'ladi", dedi Guskov.

Malumot uchun, Bogdan Guskov (16-3) UFC'da hozirgacha 3 ta jang o'tkazib, 2 g'alaba va 1 ta mag'lubiyatni o'z hisobiga yozdirdi. U o'zining so'nggi jangini 27 aprel kuni amerikalik Rayan Spennga qarshi o'tkazib, ikkinchi raundda nokaut orqali g'alaba qozondi. Aynan shu jangdan so'ng angrenlik yurtdoshimiz UFC reytingida 12-o'rindan joy oldi.