Bolalar futboli. Namangan tumanida g'oliblar aniqlandi + FOTO

Xususan,  14-15 sentyabr kunlari Namangan tumani markaziy stadionida 15-16 yoshli o'g'il bolalar o'rtasida “CHarm to'p” futbol musobaqalarining viloyat bosqichi bo'lib o'tdi. 

Namangan tuman hokimligi, tuman jismoniy tarbiya va sport bo'limi, tuman madaniyat bo'limi, Yoshlar ittifoqi tuman kengashi hamkorligida yuqori saviyada tashkil etilgan mazkur musobaqada asosan mahallalarda uyushmagan yoshlardan tarkib topgan 10 ta jamoa g'oliblik uchun kurash borishdi. Murosasiz va qiziqarli tarzda o'tgan bellashuvlarning yakuniy natijalariga ko'ra 3 – o'rinni CHortoq tumanining “Damariq” MFY jamoasi, 2 – o'rinni Namangan tumanining “Toshbuloq” MFY jamoasi, 1- o'rinni Norin tumanining “Furqat” MFY jamoasi egalladi. Musobaqa dasturiga muvofiq, birinchi o'rinni band etgan Norin tumani “Furqat” MFY jamoasi respublika final bosqichida ishtirok etadi.

Musobaqa yakunida g'olib va sovrindorlar kubok, medal va esdalik sovg'lari bilan taqdirlanishdi. Mukofotlarni Namangan tumani hokim S. Z. Mo'minov topshirdi.

-Ananaga aylangan “CHarm to'p” musobaqasining viloyat bosqichi tumanimizda o'tishi sportni, jumladan bolalar o'rtasida futbolni keng ommalashishiga, rivojlanishiga hissa qo'shadi, - deydi Namangan tuman jismoniy tarbiya va sport bo'limi boshlig'i Doniyor Nizomov. – Mazkur musobaqaning munosib tarzda o'tishida tuman hokimligi, viloyat jismoniy tarbiya va sport boshqarmasi va qator hamkor tashkilotlarga minnatdorchilik bildiramiz. Mahallalarda shakllangan futbol jamoalarining  bu kabi bellashuvlarda to'p surishi, viloyat va respublika bosqichlarida ishtirok etishi  - olis va chekka hududlarimizdan  futbol bo'yicha istedodlarning bo'y ko'rsatishiga zamin bo'ladi.

Ilhom RAHMONOV tayyorladi, o'z muxbirimiz