O'zbekistonda qator professional futbol klublari ishonchli boshqaruvga beriladi

Mazkur jarayon sport sohasini moliyalashtirish mexanizmlarini takomillashtirish hamda tarmoqqa tadbirkorlik subektlarini kengroq jalb qilish maqsadida amalga oshirilmoqda.

Belgilangan talablarga ko'ra, professional futbol klublari faoliyati bilan bog'liq yillik barcha xarajatlarning kamida 20 foizi miqdorida homiylik mablag'larini kiritgan tadbirkor yoki tadbirkorlar guruhi ushbu jamoalarni boshqaruvga olishi mumkin. Tanlovga qo'yilgan jamoalar qatoridan "Bunyodkor", "Buxoro", "Dinamo", "Qizilqum", "Navbahor", "Nasaf", "Neftchi", "Lokomotiv", "Mashal", OKMK va "Paxtakor" klublari joy olgan.

Futbol klublarini ishonchli boshqaruvga olgan tadbirkorlarni davlat tomonidan qo'llab-quvvatlash maqsadida tizimli imtiyozlar taqdim etiladi. Xususan, yuridik shaxslarning foyda solig'ini hisoblashda sof foyda klublarni moliyalashtirishga yo'naltirilgan homiylik mablag'lari summasiga, biroq soliqqa tortiladigan foydaning 10 foizidan oshmagan miqdorda kamaytiriladi. SHuningdek, mazkur klublar futbolchilari jismoniy shaxslardan olinadigan daromad solig'ini to'lashdan ozod etiladi – ular uchun ijtimoiy soliq stavkasi 1 foiz miqdorida qatiy belgilanadi.

Bundan tashqari, tadbirkorlarga tijorat banklari tomonidan klublarni sotib olish yoki sport obektlarini qurish va kapital tamirlash ishlari uchun 1 yillik imtiyozli davr bilan 5 yil muddatga yillik 14 foiz stavkada kreditlar ajratiladi. Buning uchun sarmoyador tomonidan istiqbolli biznes-reja va likvidli garov taminoti taqdim etilishi lozim – bunda klub balansidagi bino, inshoot va er maydonlari garovga olinmaydi. SHu bilan birga, klubni boshqaruvga olgan sarmoyadorlar o'z mahsulot hamda xizmatlarini sport translyaciyalari davomida O'zbekiston milliy teleradiokompaniyasi tizimidagi markaziy va hududiy telekanallarda reklama qilishda 50 foizlik chegirmaga ega bo'lishadi.