Bolalar sporti. Sportga oshno maskan

CHirchiq  sanoat va xizmat ko'rsatish kasb-hunar kollejida ayni paytda 800 nafardan ortiq o'quvchilar turli kasb-hunarlar bo'yicha tahsil olishadi. Kollej hovlisidagi batartib mini-futbol, engil atletika kabi sport maydonchalari, keng va shinam sport zali doim o'quvchilar bilan gavjum. 

Boisi, sportning voleybol, engil atletika, basketbol, stol tennisi, shaxmat, stol tennisi to'garaklarimuntazam ishlab turibdi. To'g'ri, mazkur tashkil etilgan to'graklarda ishtirok etayotgan o'g'il-qizlar professional sportchi darajasiga ko'tarilmas, biroq sog'lom turmush tarzini teranroq anglab borishi shubhasiz. 

Qolaversa, muntazam mashg'ulotarda ishtirok etayotgan sportchi-o'quvchilar  turli darajadagi sport bellashuvlarida muvaffaqiyatlarga erishishlari uchun sabab bo'lishi yanayam quvonarli. Tajribali jismoniy tarbiya o'qituvchilari Kadriya Davidova (Jismoniy tarbiya rahbari) hamda Umidjon Abbosovlar murabbiyligida har kuni ertalab o'quv-mashg'ulotlar boshlanmasdan burun barcha o'qituvchi va o'quvchilar ishtirokida gimnastika, ertalabki badantarbiya mashg'ulotlarini  bajarilishi yigit-qizlarning  kun davomida tetik va yuqori kayfiyatda yurishini, darslarni o'zlashtirish darajasi ham yuqori bo'lishini ko'rsatmoqda.  

SHuningdek, kollejda voleybol, basketbol, stol tennisi. shaxmat va mini-futbol bo'yicha haftaning olti kunida darslardan bo'sh vaqtlarda guruxlararo  musobaqalar o'tkazilishi yo'lga qo'yilgan. Kollej direktori Olimjon Muqimovning talabchanligi va sportga oshnoligi bois jismoniy tarbiyaga oid ishlar birinchi o'rinda turadi.

Kishi jismoniy holatini aniqlashda “Alpomish va Barchinoy” test-meyorlarining o'rni beqiyos. SHu bois har yili bahor faslida mazkur test-sinovlarini o'quvchi va o'qituvchilar ishtirokida qabul qilinishi kollejda odat tusini olgan.  O'quvchilarning takidlashicha, “Alpomish va Barchinoy” test-sinovlarini topshirish jarayoni chin manoda sport bayramiga aylanib ketadi. Bu ham bo'lsa qaysidir manoda  keng jamoatchilik orasida jismoniy tarbiya va sportning ommalashishiga, yanada qiziqishi ortishiga olib kelishi bor haqiqat. 

Demak, jismoniy holatimizni aniqlash va yaxshilash sari sport maydonchalari tomon ketdik. 

Ilhom RAHMONOV tayyorladi, o'z muxbirimiz