Brendon Moreno Deyvesonning irqchilik haqidagi ayblovlariga javob qaytardi

Brendon Moreno meksikalik bilan to'rtinchi jangdan bosh tortganini raqib jamoadagi irqchilikning namoyon bo'lishi bilan izohlagan amaldagi divizion chempioni Deyveson Figeredoga javob qaytardi.

«Bu shunchaki ahmoqlik», dedi Moreno ESPN Deportes'ga. «Mening do'stim matbuot anjumanini jonli efirda uzatib, telefonidagi filtrlar bilan o'ynab yurgan edi. Afsuski, bizda to'liq video yo'q – u saqlamagan. U hammaga - Dana Uaytga, jamoadoshlarimga va hatto menga filtr qo'ydi. Figeredo maymun niqobi bilan paydo bo'lganida, kimdir skrinshot oldi va Marselo Roxoni irqchi deb atay boshladi. Biz hammamiz Marseloni bilamiz – u irqchi deb atalgan oxirgi odam».

Morenoning takidlashicha braziliyalikning so'zlariga qaramay, UFC unga ular o'rtasidagi to'rtinchi jangni tashkil etish hozirda ustuvor vazifa ekanligini va boshqa variantlar ko'rib chiqilmaganini tasdiqladi.

«Men UFC bilan, tashkilotdagi asosiy yigitlar bilan gaplashdim - ular menga to'rtinchi jang tayinlanganini  va bu haqda tashvishlanishga hojat yo'qligini aytishdi. Mening rejam yana chempionlik uchun kurashish va Deyveson mendan uzoqlashishga harakat qilmoqda. Men yolg'on gapirmayman – UFC Moreno va Figeredoni to'rtinchi jangda ko'rmoqchi. Men allaqachon «ha» dedim, lekin boshqa tomonning javobini eshitmadim».