Bugun tarixiy kun! Uch tennis malikamiz Uimbldon asosiy to'ridagi ishtirokini boshlaydi

Bugun London shahrida tennis bo'yicha "Katta Dubulg'a" turkumiga kiruvchi, umumiy mukofot jamg'armasi 86 million dollarni tashkil etuvchi Uimbldon turnirining asosiy to'r bahslari boshlanadi hamda erkaklar va ayollar musobaqasining har birida 128 nafardan tennischi bosh sovrin uchun kurashga kirishadi.  

Quvonarlisi, tarixda ilk bor O'zbekistonning bir yo'la uch tennis malikasi "Katta Dubulg'a" turnirining asosiy to'rida ishtirok etadi va ularning uchchalasi ham bugun birinchi davra uchrashuvida kortga chiqadi. Birinchi raketkamiz Kamilla Rahimova 1/64 finalda ukrainalik Angelina Kalininaga qarshi bahs olib boradi. Ushbu bahs bizning vaqt bilan soat 15:00da boshlanadi. Rahimova ayni paytda dunyoning 70, Kalinina esa 66-raketkasi bo'lib turibdi. 

Ikkinchi raketkamiz Mariya Timofeeva birinchi davrada braziliyalik Beatris Xaddad Mayyaga qarshi kortga chiqadi. Mariya WTA reytingida 95, Beatris 134-o'rindan joy olgan. Ushbu uchrashuv soat 17:00da boshlanadi. 

Hozirda WTA reytingida 113-pog'onada borayotgan mamlakatimizning uchinchi raketkasi Polina Kudermetova esa 1/64 finalda dunyoning 41-raketkasi, rossiyalik Lyudmila Samsonova bilan hisob-kitob qiladi. Bu to'qnashuv soat 20:30da start olishi belgilangan.