Butunjahon shaxmat Olimpiadasi. Ayollar o'rtasidagi bahslarda vaziyatimiz qanday? (+ FOTO)

O'zbekiston ayollar terma jamoasi kecha 6-turda Niderlandiya bilan 2:2 hisobida durang o'ynashdi. Qizlarimiz 45-Butunjahon shaxmat Olimpiadasining 1-turida Gaitini 4:0, 2-turda Angolani 3:1, 3-turda Vengriyani 2,5:1,5, 4-turda Bolgariyani 2,5:1,5 hisobida mag'lubiyatga uchratishdi. Beshinchi turda amaldagi Olimpiada vice-chempioni Gruziyaga 1,5:2,5 hisobida imkoniyat boy berildi. To'rtta g'alaba evaziga ayollar terma jamoamiz o'z tarixidagi eng yaxshi natijasini qayd etdi. Bu yog'iga rekord yangilanib boraveradi.   

Ayollar o'rtasidagi musobaqada ham xuddi erkaklarda bo'lgani singari bitta terma jamoa 100 foizlik natija qayd etib turibdi. Hindiston 6 ta uchrashuvning barchasida g'alaba qozongan. Hindlar 6-turda Armanistonni 2,5:1,5 hisobida engishdi. Vengriya - Peru uchrashuvida 2:2 hisobi qayd etildi. Gruziya Mo'g'ulistondan 2,5:1,5 hisobida ustun keldi. Xitoy biroz kutilmaganda xuddi shu hisobda Polshaga yutqazib qo'ydi. Tarkibida Gulruhbegim Tohirjonova o'ynayotgan AQSH terma jamoasi SHveycariyani 2,5:1,5 hisobida taslim etdi. 

Bugun Olimpiadada dam olish kuni. Ertaga o'tkaziladigan 7-turda Hindiston Gruziyaga qarshi bahs olib boradi. O'zbekiston terma jamoasi esa o'zi singari 9 ochkoga ega greciyalik shaxmatchilar bilan hisob-kitob qiladi. SHaxmatchilarimiz 7-tur oldidan 9 ochko bilan qo'shimcha ko'rsatkichlarga ko'ra 16-o'rinni egallab turibdi. 

7-turning markaziy uchrashuvlari:

Hindiston - Gruziya

Avstriya - Vengriya

Ukraina - Polsha

Ozarbayjon - Qozog'iston

Armaniston - AQSH

Mo'g'uliston - Germaniya

Ispaniya - Franciya

Greciya - O'zbekiston