Butunjahon shaxmat Olimpiadasi. Erkaklar jamoamizda ilk mag'lubiyat

42-Butunjahon shaxmat Olimpiadasida O'zbekiston ayollar va erkaklar terma jamoalari ham ishtirok etyapti. 17-jahon chempioni Rustam Qosimjonov boshchiligidagi O'zbekiston erkaklar terma jamoasi Butunjahon shaxmat Olimpiadasining dastlabki ikki turida Bruney va Dominikan Respublikasi terma jamoalarini 4:0 hisobida mag'lub etgandi.

Afsuski, kecha o'tkazilgan uchinchi tur uchrashuvida shaxmatchilarimiz CHexiya terma jamoasiga 1:3 hisobida imkoniyatni boy berishdi. Rustam Qosimjonov va Jahongir Vohidov mos ravishda David Navara hamda Viktor Laznikka yutqazdi. Anton Filippov va Marat Jumaev raqiblari bilan durangga imzo chekishdi.

Ushbu mag'lubiyatdan so'ng terma jamoamiz qo'shimcha ko'rsatkichlarga ko'ra 62-o'ringa tushib ketdi. Bugun terma jamoamiz shaxmatchilari Argentina vakillariga qarshi bahs olib borishadi.