CHarlz Oliveyraning Benil Dariushga qarshi jangi bekor qilindi

Engil vazn toifasida braziliyalik UFC sobiq chempioni CHarlz Oliveyra navbatdagi jangini 7 may kuni Benil Dariushga qarshi o'tkazishi lozim edi.

Biroq UFC 288 turnirining co main event'i bo'lmish Oliveyra — Dariush jangi bekor qilingan. Bunga CHarlzning jangga yaqin olgan jarohati sabab bo'lgan.

ESPN nashrining xabar berishicha, UFC ayni damda mazkur jangning yangi sanasi ustida ishlamoqda.

Eslatib o'tamiz, CHarlz Oliveyra o'tgan yilning 22 oktyabr kuni Abu-Dabida o'tkazilgan UFC 280 turnirining markaziy jangida Islam Maxachevga yutqazib qo'ygandi. Braziliyalik jangchi hisobida 33 g'alaba va 9 mag'lubiyat bor.

Beneil Dariush esa 8 ta jangdan iborat g'alabali seriya bilan bormoqda. U ham oxirgi jangini UFC 280 turniri doirasida o'tkazib, Mateush Gamrotni ochkolar hisobiga ko'ra mag'lubiyatga uchratgan edi. Dariush MMAda 22 g'alaba, 4 mag'lubiyat va 1 ta durang qayd etgan.