CHirchiqda 6 ta sport turiga mo'ljallangan zal foydalanishga topshirildi + FOTO

O'zbekiston Respublikasi Konstituciyasining 30 yilligi munosabati bilan CHirchiq olimpiya va paralimpiya sport turlariga tayyorlash markazida yangi barpo etilgan, 6 ta sport turlari uchun mo'ljallangan kurash sport zalining ochilish marosimi bo'lib o'tdi. 

Mazkur ochilish marosimiga O'zbekiston Respublikasi sportni rivojlantirish vaziri maslahatchisi Avazjon Karimov, O'zbekiston Milliy paralimpiya qo'mitasi departamenti direktori Alimov Mirsardor, CHirchiq shahar hokimi o'rinbosari Rufat Sayliev, shuningdek bir qancha mutasaddi tashkilot rahbarlari tashrif buyurdi. 

Kurash zali tantanali ravishda Sportni rivojlantirish vaziri maslahatchisi Avazjon Karimov tomonidan ochib berildi. Tadbir davomida yangi barpo etilgan sport binosining shart-sharoitlari va mashg'ulot jarayonlari bilan tanishib o'tildi. 

Bugungi kundagi yoshlarga berilayotgan imkoniyatlar va shart-sharoitlar negizida kelajak avlodning Vatanga bo'lgan muhabbatini, yurtimiz ravnaqini nufuzli musobaqalarda namoyon qilish oliy maqsaddir.