CHortoqdagi bel olish va uch kurash bahslarida g'oliblar aniqlandi

CHortoq tumanidagi bolalar-o'smirlar sport maktabida bel olish va uch kurash bo'yicha 2004-2005 yillarda tug'ilgan o'g'il bolalar va qizlar o'rtasida O'zbekiston chempionati yakunlandi.

O'zbekiston Respublikasi Jismoniy tarbiya va sport vazirligi hamda O'zbekiston Bel olish va uch kurash associaciyasining yillik taqvim-rejasidagi mazkur mamlakat chempionatida Qoraqalpog'iston Respublikasi, Toshkent shahri va barcha viloyatlardan 800 nafardan ortiq sportchilar o'z vazn toifalariga ko'ra, g'oliblik uchun bellashishdi.

CHempionat reglamentiga muvofiq, dastlab bel olish kurashi bo'yicha kuchlilar nomi aniqlandi. SHohsupadan joy olgan yosh polvonlar diplom, medal va qimmatbaho esdalik sovg'alari bilan mukofotlanishdi. Bel olish kurashi bo'yicha bahslar yakuniga etgach, musobaqa dasturiga binoan 2004-2005 yillarda tug'ilgan o'g'il-qizlar uch kurash bo'yicha mamlakat chempionligi uchun bahslarga kirishdi. 

Murosasiz o'tgan bellashuvlarning yakuniy natijalariga ko'ra 41kg.da Ozodbek Abdusalimov (Andijon), 44kg. da Sarvar Qosimjonov (Andijon), 60kg. da Bekzod Tursunov (Surxondaryo), 77kg. da Fazliddin Oripov (Farg'ona), 48kg. da Hilola Ortiqboeva (Sirdaryo), 52kg. da Nilufar Tojimurodova (Namangan), 56kg. da Masuma Rahmatqulova (Surxondaryo) singari yosh sportchilar o'z vazn toifalarida barcha raqiblarini mag'lubiyatga uchratib, faxrli birinchi o'rinlarni egallashdi. 

Kuchli uchlikdan joy olgan sportchilarga tashkilotchilar tomonidan diplom, medal va esdalik sovg'alari topshirildi.

Ilhom RAHMONOV tayyorladi