Dana Uayt Xollouey - Oliveyra jangiga munosabat bildirdi

Ammo shuning barobarida CHarlz Oliveyraning BMF chempionlik kamari uchun kechgan jangda Maks Xolloueyni mag'lub etganini tanqid qilganlarning fikriga ham qo'shilmasligini aytdi.

"Men parterdan ko'ra tik holatda ko'proq ishlashini, Maks teykdaunlardan yaxshiroq himoyalanishini, agar uni parterga o'tkazishsa, tezda o'rnidan turishini kutgandim. Lekin bunday kutilmagan burilishlar bo'lib turadi. Zero, har qanday jangdan maqsad - g'alaba!

CHarlz g'alaba qozonish uchun qilinishi kerak bo'lgan barcha ish va chorani amalga oshirdi. Siz Maksdan so'rashingiz kerakdir, lekin mashg'ulot lagerida ular boshqa narsani kutishgan bo'lsa kerak. Agar siz CHarlzning janglarini tomosha qilgan bo'lsangiz, u tik holatda jang qilishdan qo'rqmaydi. Va, shubhasiz, Oliveyra jamoasida haqiqatan ham Maksni parterga o'tkazishsa, hammasi hozirgidek bo'lishiga ishonishgan", - dedi Uayt UFC 326 turniridan keyingi matbuot anjumanida.

Eslatib o'tamiz, amerikalikka tegishli BMF kamari o'rtaga qo'yilgan engil vazn toifasidagi ushbu jang to'liq besh raund davom etib, yakunda braziliyalikning ochkolar hisobidagi g'alabasi bilan tugagandi.