Daniel Korme Islam Maxachevning asosiy muammosini aytdi

Kormening aytishicha, Islam Dastin Porega qarshi o'tkazgan jangi uchun tanqidlarga loyiq emas. Maxachev amerikalik tajribali raqibini beshinchi raundda bo'g'ish usuli bilan mag'lubiyatga uchratgan edi. 

"Islamning muammosi shundaki, u kutish qurboniga aylandi. Muddatidan oldin g'alaba qozonmagan taqdirda ham u raundlar bo'yicha 4-1 hisobida oldinda borayotgandi. Bu kattagina ustunlik. Islam zo'r jang qildi. Maxachev "stoyka"da, yani tik holatda ham xavfli zarba egasi ekanini namoyish eta oldi. O'ylashimcha, u o'z vazifasini yaxshi uddaladi. Lekin yuqorida aytganimdek, u kutish qurboniga aylandi. Har holda u Xabib emas! Xabib barcha janglarida birinchi raqam ostida harakat qilgan. Oktagonda jang uning nazorati ostida kechardi. Hech qachon uni qiyin holatda ko'rmaganman. SHuning uchun, Islamda Xabibning natijasi va janglarini kutish noo'rin", - deya Xtra MMA kanaliga intervyu bergan Korme.

Eslatib o'tamiz, Islam Maxachev navbatdagi jangini 26 oktyabr kuni Abu-Dabida tashkil etiladigan UFC 308 turniri doirasida o'tkazishi kerak. Katta ehtimol bilan uning raqibi reytingda birinchi o'rinni egallab turgan Arman Carukyan bo'ladi.