Dunyoning birinchi raketkasi WTA Yakuniy turnirini g'alaba bilan boshladi

Dunyo reytingida kuchli sakkiztalikdan joy olgan tennis malikalari ishtirokida o'tayotgan mavsumning Yakuniy turnirida guruh bosqichining birinchi tur uchrashuvlari o'tkazildi. 

Sayyoramizning birinchi raqamli tennis malikasi, polshalik Iga Svyontek WTA reytingida sakkizinchi pog'onadan joy olgan rossiyalik Darya Kasatkinani ortiqcha qiyinchiliksiz mag'lub etdi - 6/2, 6/3. 

Tennischilarning o'zaro uchrashuvlaridagi hisob Svyontek foydasiga yanada yiriklashdi - 5:1. Sakson uch daqiqa davom etgan bahsda Kasatkina ham, Svyontek ham bittadan eys zarbasini amalga oshirishgan.