Eddi Xirn: "Joshua Usikka qarshi tajovuzkor va aqlli boks ko'rsatishi kerak"

Xirnning so'zlariga ko'ra, Joshua o'zining birinchi jangidayoq yo'l qo'ygan xatosini anglab etgan va chempionlik kamarlarini qaytarib olish uchun barcha imkoniyati bor.

"Joshua birinchi to'qnashuvda qilgan xatolarini boshqa takrorlamaydi. Entoni bu jangga noto'g'ri yondashganini biladi.

Biz Dillian Uaytga masofani qisqartirishi va shunga o'xshash narsalarni aytgandik. Entoniga ham shunday qilishi kerakligini o'rgatdik. Ammo, raqib bunga yo'l bermasligi mumkin" — dedi Eddi Xirn.

Xirnning takidlashicha, Joshua g'alaba qozonish uchun o'z uslubini o'zgartirishi kerak edi.

"Joshua o'z uslubini o'zgartirishi, tajovuzkor va aqlli boks ko'rsatishi kerak. Menimcha, u buni uddalay oladi. Joshua bu jangda g'alaba qozonishiga chin dildan ishonaman. Uning o'zi ham bunga ishonadi va biz bu jangni intiqlik bilan kutyapmiz", — deya qo'shimcha qildi Xirn.

Eslatib o'tamiz, ilk jangda ukrainalik bokschi Joshuani ochkolar hisobiga ko'ra mag'lub etib, chempionlik kamarlariga ega chiqqandi. Revansh jangi iyul oyida Saudiya Arabistoni yoki AQSHda bo'lib o'tishi kutilmoqda.