Egambergan Iskandarov: "Kelajakda O'zbekiston bayrog'ini yanada balandlarga ko'taraman"

Ushbu jahon chempionatining o'smirlar o'rtasidagi bellashuvlarida -53 kg vaznli Egambergan Iskandarov barcha raqiblarini mag'lubiyatga uchratib, oltin medalni qo'lga kiritdi.

O'zbekiston sambo associaciyasi matbuot xizmati yosh chempionning fikrlari bilan qiziqdi. 

"Sambo bilan 7 yildan buyon shug'ullanaman. Bungacha 4 marotaba O'zbekiston, 2 marotaba Osiyo chempioni bo'lganman. Bir necha kun oldin Greciyaning Saloniki shahrida bo'lib o'tgan jahon chempionatida barcha raqiblarimni mag'lubiyatga uchratib, oltin medalni qo'lga kiritdim. Bundan judayam xursandman. 

Fursatdan foydalanib, ushbu darajaga etib kelishimda meni qo'llab-quvvatlab turgan ota-onam va murabbiylarim, shuningdek O'zbekiston sambo associaciyasi raisi Alisher Alimovga o'z minnatdorchiligimni bildiraman.

Kelajakda bundan ham yuksak yutuqlarni qo'lga kiritib, O'zbekiston bayrog'ini balandlarga ko'tarmoqchiman", - dedi Egambergan Iskandarov.