Freestyle Chess Grand Slam. 1/4 finalda Abdusattorov - Karlsen bahsi. Sindarov kimni tanladi?

Dunyoning ko'zga ko'ringan grossmeysterlari qatnashayotgan musobaqada ikki shaxmatchimiz - Nodirbek Abdusattorov va Javohir Sindarov ham o'z mahoratini namoyish qilyapti. 17 fevralga qadar davom etadigan turnir aylana tizimda o'tkazilib, unda bir shaxmatchi qolgan hamma ishtirokchilar bilan rapid formatida o'zaro bahs olib boradi. 

Ikkinchi kungi bahslardan so'ng 1/4 finalga yo'l olgan shaxmatchilar malum bo'ldi. Saralash bahslarini ko'tarinki ruhda o'tkazgan Javohir Sindarov ikkinchi, biroz omadi yurishmayotgan Nodirbek Abdusattorov esa 7-o'rinni egallagan hoolda pley-offga chiqdi. 

Reglamentga ko'ra, peshqadamlar 1/4 finaldagi raqibni o'zlari tanlash imkoniyatiga ega edilar. Qo'shimcha ko'rsatkichlarga ko'ra 1-o'rinni egallagan Alireza Firuzdja nisbatan osonroq raqib - germaniyalik Vinsent Keymerni tanladi. Ikkinchi o'rin bilan pley-offga chiqqan Javohir Sindarovning tanlovi Magnus Karlsen va boshqa ishtirokchilarni hayron qoldirdi. U amerikalik Hikaru Nakamurani tanladi.  

Nodirbek Abdusattorov 1/4 finalda norvegiyalik afsona Magnus Karlsenga qarshi bahs olib boradigan bo'ldi. Kecha bu ikki grossmeysterning saralash bosqichidagi uchrashuvida Karlsen g'alaba qozongandi. CHorak finalning so'nggi juftligida amaldagi jahon chempioni Gukesh Dommaradju Fabiano Karuanaga qarshi dona suradi.