Golovkin Alvaresni dopingda aybladi, tekshiruvchilarni esa terrorchi deb atadi

Qozog'istonlik bokschi Kaliforniyada davom etayotgan mashg'uloti chog'ida mahalliy jurnalistlarga intervyu berdi. Savollarga javob berar ekan, Golovkin Alvaresning jamoasi bila turib doping istemol qilayotganini aytdi. 

“Qo'ysangizchi, qanaqa go'sht, - dedi Golovkin. - Kaneloning jamoasi taqiqlangan moddalardan foydalanayotganini juda yaxshi biladi. Ular buni berkitishga harakat qilishyapti. Saul birinchi kun boksda emas. Uni detektorda tekshirib ko'ringlar, shunda hammasi oydinlashadi. Men ilk jangimizdayoq uning “toza” emasligini bilgandim. O'sha jang videosini takroran tomosha qilsangiz, taqiqlangan preparatlarning shundoqqina izi ko'rinadi”.

Meksikalik bokschining jamoasi taqiqlangan klenbuterol moddasi uning qon tarkibiga go'sht orqali tushib qolganini ro'kach qilayotgandi. Ayni paytda Nevada Sport komissiyasi bu borada izlanish olib boryapti. Golovkin bu tashkilotni ham jiddiy tarzda tanqid ostiga oldi. 

- Ular vaziyatga yumuq ko'z bilan qarashyapti. Men jangni qayta ko'rib chiqib, fikrim qanchalik to'g'ri ekanligiga yana bir bor iqror bo'ldim. Sport komissiyasida ishlayotganlar odam emas, ular sportni o'ldirayotgan terrorchilar! Ularning joyi qamoqda!, -dedi Golovkin.