Irismetov Rossiyaning o'yini haqida: "Ular ko'proq ispanlarga o'xshab qolibdi"

"O'ylashimcha, o'yin natijasi adolatli. Rossiyaning klassi ko'rinib turdi. O'zbekiston uchrashuvni yaxshi boshladi. Asosiy burilish pallasi — o'zgarishlar boshlangan vaqt bo'ldi. Qolaversa, milliy jamoamiz tarkibi tajribaviy edi. Ko'plab yangi nomlar, yoshlar maydonga tushdi, menimcha, Kannavaro futbolchilarni ko'zdan kechirib olishi kerak edi.

Agar xuddi shunday o'ynab, bir-ikkita o'zgarish bilan qaerdadir himoyaga yotganimizda ham bo'lardi... Ammo hujumkor futbol namoyish etishga qaror qildik va bu o'xshamadi. Biz, muxlislar uchun o'yin tomoshabop kechdi. Beshta gol ko'rdik, buning ustiga Rossiyani anchadan beri ko'rmagan edim, ular iliq taassurot qoldirishdi.

Raqib tarkibida Tyukavinni ajratib ko'rsatish mumkin — u chakki harakat qilmadi, Batrakov bugun biroz o'z darajasida emasdi, biroq baribir mahorati bilinib turibdi.

Meni Rossiyaning ko'proq ispanlarga o'xshab qolgani hayron qoldirdi. Ularning bo'yi past, tezkor, paslar orqali harakat qilishmoqda. Bo'ydor o'yinchilarning kamligi ajablantirdi. Faqat ikkinchi bo'limda maydonga tushgan Komlichenko biroz bo'ydorroq edi.

Agar Rossiyani Evropa maydonlariga qaytarishsa, qita chempionatiga chiqa olishgan bo'larmidi? Evroga yo'llanma olishardi, biroq qanday guruh tushishiga ham ko'p narsa bog'liq. Qolaversa, ular xalqaro turnirlarda anchadan beri o'ynashgani yo'q, shu bois hozirgi o'yiniga qarab biror nima deyish qiyin. Ammo, menimcha, Evropa va jahon chempionatlariga chiqa olishgan bo'lardi.

Rossiya o'yin uslubini biroz o'zgartiribdi, yuqorida takidlaganimdek — qisqa va o'rtacha paslar ko'p, uzun uzatmalar esa kam. Ular yaxshi futbol ko'rsatib, ijobiy taassurot qoldirishdi.

Bu biz uchun ham juda foydali bahs bo'ldi — kim qanday holatda ekanligini ko'rib oldik. O'ylashimcha, agar O'zbekiston asosiy tarkibda harakat qilganida, bundan ham kuchliroq o'yin namoyish etgan bo'lardik. Keyingi bahslarda Rossiyaga omad tilayman", — dedi "Spartak"ning sobiq futbolchisi.