Grand Chess Tour: Sindarovda ketma-ket ikkinchi g'alaba, bugun chempionlik So bilan bahsda hal bo'ladi

Dunyoning ko'zga ko'ringan grossmeysterlari ishtirok etayotgan turnir klassik shaxmat yo'nalishida 9 turdan iborat aylanma tizimida o'tkazilyapti. Javohir Sindarov ketma-ket ikkinchi g'alabasini tantana qildi. O'tgan turda qora donalarda o'ynaganiga qaramay, peshqadamlardan biri germaniyalik Vinsent Keymerni mag'lubiyatga uchrata olgan hamyurtimiz 8-turda niderlandiyalik Yorden van Forestni ham taslim etdi. 

Hindistonlik Rameshbabu Praggnanandha qora donalarda franciyalik Maksim Vashe-Lagravdan ustun keldi. Turning uchinchi g'alabasiga Vinsent Keymer erishdi. O'tgan turda Javohirga yutqazgan germaniyalik grossmeyster oq donalarda o'ynab, amerikalik Fabiano Karuanani engishga muvaffaq bo'ldi. Qolgan ikki partiya durang natija bilan yakunlandi.  

Bugun o'tkaziladigan so'nggi to'qqizinchi tur oldidan turnir jadvalida hamon amerikalik Uesli So 5 ochko bilan peshqadamlik qilmoqda. Rameshbabu Praggnanandha ham kechagi g'alabasi evaziga ochkolarini 5 taga etkazib oldi. U qo'shimcha ko'rsatkichlarga ko'ra ikkinchi o'rinni band etgan. Javohir 4,5 ochko bilan uchinchi o'ringa ko'tarilib oldi. Vinsent Keymer hisobida ham 4,5 ochko bor. Fabiano Karuana, Levon Aronyan, Maksim Vashe-Lagrav va Sem Sevyan 4 ochko bilan keyingi o'rinlarni band etgan. Anish Giri 3,5 ochko bilan 9-o'rindan joy olgan bo'lsa, 1,5 ochkoga ega Yorden van Forest so'nggi 10-o'rinda bormoqda.   

Bugun 9-turda Javohir Sindarov qora donalarda peshqadam va shu bilan birga musobaqaning amaldagi chempioni Uesli So bilan hisob-kitob qiladi. Ehtimoiy g'alaba hamyurtimizni chempionga aylantirishi mumkin. Lekin bu holatda qolgan o'yinlarning natijasi ham muhim hisoblanadi. Rameshbabuda ham chempionlik uchun imkoniyat saqlanib turibdi. Ochkolar teng bo'lib qolgan holatda, chempionni aniqlash uchun qo'shimcha tay-brek o'ynaladi. Bugungi uchrashuvlar ham bizning vaqt bilan soat 22:00da boshlanadi. 

To'liq ishtirokchilar tarkibi: Javohir Sindarov (O'zbekiston), Fabiano Karuana (AQSH), Pragnanandhaa Rameshbabu (Hindiston), Uesli So (AQSH), Levon Aronyan (AQSH), Anish Giri (Niderlandiya), Vinsent Keymer (Germaniya), Maksim Vashe-Lagrav (Franciya), Yorden van Forest (Niderlandiya), Sem Sevyan (AQSH).