Guskov uchun o'ch olmoqchi bo'lgan Jonni Uoker mag'lubiyatiga izoh berdi

Bogdan Guskovning do'sti bo'lgan braziliyalik aralash yakkakurash ustasi Ar-Riyodda o'tgan UFC on ABC 6 turnirining asosiy kardini ochib bergan jangda tajribali Volkan Ozdemirga birinchi raundning o'zida nokaut bilan yutqazgandi. 

"Menda hammasi joyida. Labimda kichik jarohat bor, xolos. Men yaqindagina uyga qaytdim. Bu oqshom men uchun omadsiz keldi. Nima bo'lganini bilmayman. Jangni qayta ko'rib chiqib, qaerda xato qilganimni tahlil qilishim kerak. O'zimni jismoniy taraflama juda yaxshi his qilayotgandim. Katta ehtimol bilan psixologik tomondan men bu jangga tayyor emasdim. Vazn tashlash odatdagidek qiyin kechgandi. Bir so'z bilan aytganda jangda o'zimni topa olmadim. Endi oila azolarim bilan vaqtni o'tkazaman", - dedi Jonni. 

Eslatib o'tamiz, hamyurtimiz Bogdan Guskov UFC`dagi debyut jangida aynan Volkan Ozdemirga imkoniyatni boy berib qo'ygandi. Jangdan oldin Uoker o'sha mag'lubiyat uchun Ozdemirdan revansh olishga vada bergan edi.